Եվրամիությունը ռուսական փայլաթիթեղի համար կրկին հակադեմփինգային տուրք է սահմանել: Այս մասին հաղորդում է ԵՄ-ի իրավական կայքը: Տուրքը սահմանվում է ՌՈՒՍԱԼ-ի (Ռուսաստանում փայլաթիթեղ արտադրող միակ ընկերության) 0.008 - 0.018 մմ հաստությամբ փայլաթիթեղի համար:
Պաշտոնական Բրյուսելի կարծիքով, ռուսական փայլաթիթեղի դեմփինգային շահույթը կազմում է 34%: Եվրահանձնաժողովում կարծում են, որ հենց այդքան է ռուսական փայլաթիթեղի՝ շուկայականից ցածր արտահանման գինը:
Հաղորդագրությունում նշվում է, որ տեղական արտադրողների վնասը ծածկելու համար բավարար կլինի 12.2%-անոց մաքսատուրքը: Այն կվերաբերի ՌՈՒՍԱԼ-ի փաթեթավորող երկու ձեռնարկության՝ «Ուրալի փայլաթիթեղ»-ին եւ «Սայնալ»-ին:
Նշենք, որ ՌՈՒՍԱԼ-ի արտադրանքի դեմ սահմանված պատժամիջոցները չեն տարածվում Ռուսաստանի սահմաններից դուրս, մասնավորապես, չեն առնչվում Հայաստանում գործող «Արմենալ» գործարանին: