Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր՝ հուլիսի 5-ին կալանքի որոշում է կայացրել Արա Բուդաղյանի նկատմամբ, որը մեղադրվում է Սյունիքի մարզպետ Սուրիկ Խաչատրյանի՝ Լիսկայի դեմ մահափորձի մեջ։ Կալանքի որոշումը կայացրել է դատավոր Գագիկ Պողոսյանը։
Բուդաղյանի փաստաբան Հայկ Ալումյանը NEWS.am-ի թղթակցի հետ զրույցում նշեց, որ չափազանց բացասական է գնահատում դատարանի որոշումը։ «Դատարանը նման որոշում կայացնելու որեւէ հիմք չուներ»,- նշեց փաստաբանը՝ հավելելով, որ հենց վաղը բողոքարկելու են կալանքի որոշումը։
Նշենք, որ Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր կալանավորել է նաեւ մյուս երեք մեղադրյալներին՝ ՝ Գարեն Ռոմիկի Աթաջանյանին, Հենրիկ Շահենի Ավագյանին եւ Վիտալի Վլադիմիրի Մինասյանին։
Ավելի վաղ հայտնել էինք, որ Սյունիքի մարզպետ Սուրիկ Խաչատրյանի եւ նրա ուղեկիցների նկատմամբ 2015թ. մայիսի 20-ին ժամը 18:15-ի սահմաններում հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին, ձերբակալվել են ՀՀ Սյունիքի մարզի Կապան քաղաքի բնակիչներ՝ Գարեն Ռոմիկի Աթաջանյանը, Հենրիկ Շահենի Ավագյանը եւ Գորիս քաղաքի բնակիչներ՝ Վիտալի Վլադիմիրի Մինասյանը եւ Արա Էմիլի Բուդաղյանը:
Մասնավորապես, Արա Բուդաղյանը կասկածվում է սպանությանը դրդելու մեջ, սակայն հերքում է իրեն մեղսագրվող արարքը։
Նշենք, որ Արա Բուդաղյանը մարզպետի տան մոտ սպանված Ավետիք Բուդաղյանի եւ վիրավորված գնդապետ Արտակ Բուդաղյանի եղբայրն է։
