Հունաստանում ամփոփել են հուլիսի 5-ին անցկացված հանրաքվեի արդյունքները, որի ընթացքում երկրի քաղաքացիներն իրենց կարծիքն են հայտնել վարկատուների «եռյակի»՝ ԱՄՀ-ի, ԵԿԲ-ի եւ Եվրահանձնաժողովի առաջարկած տնտեսական ծրագրի վերաբերյալ: Քվեարկության պաշտոնական տվյալները հրապարակվել են Հունաստանի ՆԳՆ կայքում:
Քվեաթերթիկների 100%-ի հաշվարկի արդյունքներով, «դեմ» է քվեարկել քաղաքացիների 61.31%-ը, «կողմ»՝ 38.69%-ը, անվավեր է ճանաչվել քվեաթերթիկների 5.8%-ը:
Հանրաքվեին մասնակցել է քաղաքացիների 62.5%-ը. այն կայացած է համարվում, եթե հանրաքվեին մասնակցում է ընտրողների ոչ պակաս, քան 40%-ը: Քվեարկությանը մասնակցելու իրավունք ուներ շուրջ 9.9 մլն քաղաքացի:
Ըստ Lenta-ի, ավելի վաղ երկրի վարչապետ Ալեքսիս Ցիպրասը ողջունել էր հույների «համարձակ ընտրությունը» եւ հայտարարել, որ Հունաստանի կառավարությունը պատրաստ է վերադառնալ վարկատուների հետ բանակցությունների սեղանի շուրջ: Նրա խոսքով, առաջին հերթին անհրաժեշտ է հասնել բանկային համակարգի վերականգնման, ինչպես նաեւ պարտքերի վերակառուցման: