ՀՀ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում, հուլիսի 3-ին եւ 4-ին, մի խումբ պաշտոնատար անձանց կողմից կաշառք ստանալու կասկածանքով ձերբակալվել են ՀՀ Ոստիկանության ճանապարհային ոստիկանության ծառայության հաշվառման-քննական եւ տրանսպորտային միջոցների տեխնիկական փորձաքննության բաժնի հատկապես կարեւոր հանձնարարություններով ավագ տեսուչ, ոստիկանության փոխգնդապետ Սպարտակ Հարությունյանը, նույն ծառայության տեսուչներ` ոստիկանության կապիտան Արա Հարությունյանը եւ ոստիկանության ավագ լեյտենանտ Հովիկ Գալոյանը, ինչպես նաեւ, որպես միջնորդ հանդես եկած, Երեւան քաղաքի բնակիչ Արթուր Մատինյանը:
Օրենքով սահմանված կարգը խախտելու, քննություններին ձեւական մասնակցությամբ վարորդական վկայական տրամադրելու գործընթացը կազմակերպելու դիմաց` միջնորդ Արթուր Մատինյանը քաղաքացի Ա-ից պահանջել եւ ստացել է 120 000 ՀՀ դրամ կաշառք, որից 90 000 ՀՀ դրամը փոխանցել է Ս.Հարությունյանին: Վերջինս նշված գործընթացն իրականացրել է քննություններն ընդունող Ա. Հարությունյանի եւ Հ. Գալոյանի անմիջական մասնակցությամբ:
Դեպքի առթիվ ՀՀ ԱԱԾ քննչական վարչությունում հարուցվել է քրեական գործ: Կատարվում է նախաքննություն: