Նոր Արեշում, կրակոցների հետեւանքով սպանված 57-ամյա Վաղինակ Ասոյանի մարմինը հայտնաբերել է նրա կինը: Այս մասին NEWS.am-ի թղթակցի հետ զրույցում նշեց նրա եղբայրը՝ Ալբերտ Ասոյանը՝ հավելելով, որ եղբոր մարմինը հայտնաբերել է դրսում նստարանի մոտ:
«Ոչ մի բանով չէր զբաղվում, հիվանդ թոշակառու տղա էր: Գնում էր դիալեզի, գալիս էր, օրերը հաշված էին: Մի 15 րոպե կլիներ, որ նստած էր նստարանին: Կրակոցների ձայնից դուրս եկա, տեսա, որ սպիտակ «Ինֆինիտի» մեքենայով կրակողները հեռանում են: Հասել էր դպրոցի մոտ: 8 փամփուշտ կար մարմնի մեջ, հնարավոր չէր, որ ողջ մնար»,-ասաց Ալբերտը:
Նա հավելեց, որ եղբայրը ոչ մի խնդիր ոչ մեկի հետ չի ունեցել:
Ավելի վաղ NEWS.am-ը հայտնել էր, որ Երեւանի Նոր Արեշ 28-րդ փողոցում, այսօր՝ հուլիսի 6-ին, ժամը 13.00-ի սահմաններում կրակոցներ են հնչել: Ահազանգը ոստիկանությունը ստացել է 13.20-ին, հրազենային վնասվածքի հետեւանքով մահացել է 56-ամյա Վաղինակ Ասոյանը:
Մեզ հայտնի է դարձել, որ տղամարդը մահացել է հիվանդանոցի ճանապարհին: նա Նոր Արեշի բնակիչ է, տարածքում էլ հայտնաբերվել է սպանվածի «Մերսեդես» մակնիշի մեքենան:
Փաստի առթիվ հարուցվել է քրեական գործ` ՀՀ քրերական օրենսգրքի 104 (սպանություն) եւ 235 (ապօրինի կերպով զենք կրելը) հոդվածների հատկանիշներով: