Օսմանյան կայսրությունում Հայոց ցեղասպանության 100-ամյակին ԱՄՆ-ը եւ Իսրայելը կհամալրեն այն երկրների ցանկը, որոնք ճանաչել եւ դատապարտել են մարդկության դեմ այդ հանցագործությունը: Մամուլի ասուլիսում նման կարծիք է հայտնել Հայաստանի հրեական համայնքի ղեկավար Ռիմա Վարժապետյանը:
Նա հաղորդել է, որ առաջիկայում իսրայելական Կնեսետը կրկին քննարկելու է Ցեղասպանության հարցը: Նա հավելել է նաեւ, որ չարժե իրար հետ կապել Իսրայելի կողմից ցեղասպանության ճանաչման հարցն ու թուրք-իսրայելական վատթարացող հարաբերությունները:
Խոսելով այն մասին, թե ինչու Իսրայելը չի ճանաչում Հայոց ցեղասպանությունը, Վարժապետյանը նշել է, թե կան ե'ւ քաղաքական, ե'ւ հոգեբանական պատճառներ: «Թուրքիան միակ մահմեդական երկիրն է, որ աջակցել եւ, կարծում եմ, աջակցելու է Իսրայելին, իսկ ցեղասպանության ճանաչումը կխանգարի այդ հարաբերություններին: Հոգեբանական գործոնն այն է, որ հրեա ժողովուրդն իր ողբերգությունը միակն է համարում»,- ասել է Վարժապետյանը: Նա նկատել է, որ չնայած իշխանություններին, հրեա ժողովուրդը ընդունում է ցեղասպանության փաստը, իսկ Իսրայելի պես ժողովրդավարական երկրում ժողովրդի կարծիքը շատ բան է նշանակում:
Նա նկատել է, որ հայոց ցեղասպանության ճանաչման հարցում հայերը պետք է օրինակ վերցնեն հրեաներից, ավելացնեն ֆինանսավորումը, պատմական գրականություն հրատարակեն: