ԼՂՀ-ում քայլեր են կատարվում տեղեկատվական տեխնոլոգիաների ոլորտի զարգացման ուղղությամբ, սակայն այս ոլորտի զարգացմանը խոչընդոտող հանգամանքներ կան, որոնցից մեկը` պետության չճանաչված լինելն է: Այս մասին NEWS.am- Ինովացիայի թղթակցի հետ հարցազրույցում ասաց ԼՂՀ մշակույթի եւ երիտասարդության հարցերի նախարար Նարինե Աղաբալյանը: Նախարարի խոսքով` Ղարաբաղում բարելավվել է ինտերնետ-կապը, համակարգչայնացվում են դպրոցները, ՏՀՏ ոլորտում ներդրումներ կատարողներին արտոնյալ պայմաններ են տրամադրվում եւ այլն։ Սակայն Ղարաբաղի՝ որպես պետություն չճանաչված լինելը որոշ խոչընդոտներ է հարուցում:
«Ղարաբաղը դեռեւս չճանաչված հանրապետություն է, ինչի պատճառով մի շարք միջազգային բանկեր մեզ վարկեր չեն տրամադրում: Օրինակ` Հայաստանում տարբեր ծրագրեր են իրականացվում, թեկուզ` «Համակարգիչ բոլորի համար» ծրագիրը, սակայն Ղարաբաղը որպես չճանաչված երկիր կանգնում է շատ խնդիրների առաջ եւ չի կարողանում օգտվել նմանատիպ ծրագրերից. միջազգային բանկերը վարկեր չեն տրամադրում, իսկ ճանաչված ընկերությունները ծրագրեր չեն իրականացնում այստեղ»,- ասաց նախարարը:
«ՏՀՏ ոլորտի զարգացման համար նախ եւ առաջ անհրաժեշտ է լուծել տեխնիկական խնդիրները` մարդկանց ապահովել համակարգիչներով, ինչպես նաեւ ուշադրություն դարձնել համապատասխան կրթությանը հենց դպրոցներում»,- ասաց Ն. Աղաբալյանը` նշելով, որ օրինակ` դպրոցների համակարգչայնացման հարցը փորձում են լուծել սփյուռքի օգնությամբ կամ ներքին միջոցներով:
Նախարարը բարձր գնահատեց առաջին անգամ Արցախում կազմակերպված BarCampArtsakh 2010-ը` երիտասարդական ինտերակտիվ «ոչ կոնֆերանս»-ը, որը կարող է մեծապես նպաստել Արցախում ՏՏ ոլորտի զարգացմանը: