Երեւանի մամուլի ակումբի ստեղծման 20–ամյակի առիթով ԵՄԱ-ն այսօր` հուլիսի 18–ին, Երեւանի կամերային թատրոնում անցկացրեց իր ամենամյա մրցանակների հանձնման արարողությունը։

Մարզաշխարհի հանդեպ թարմ հայացքի եւ բազմակողմանի մոտեցման համար Արմեն Նիկողոսյանի անվան մրցանակին արժանացավ NEWS.am–ի մարզական լրագրող, Vera & Football խորագրի հեղինակ Վերա Մարտիրոսյանը։ Ի դեպ, այս մրցանակը շնորհվում է առաջին անգամ։

Lragir.am կայքի «Կիրակնօրյա նոթեր» հրապարակախոսական շարքի համար Վահրամ Մարտիրոսյանը արժանացավ Վալերի Այդինյանի անվան մրցանակին։

Խմբագրական հմուտ ձեռագրի համար «Արմենիա» հեռուստաընկերության «Ժամը» լրատվականի գլխավոր խմբագիր Գնել Նալբանդյանը արժանացավ Տիգրան Նաղդալյանի անվան մրցանակին։

2015թ. հունիսին էլեկտրաէներգիայի թանկացման դեմ բողոքի ակցիաների ժամանակ արված ամենատպավորիչ լուսանկարի համար «Ֆոտոլուրի» թղթակից Վահրամ Բաղդասարյանը արժանացավ Ռուբեն Մանգասարյանի անվան մրցանակի։

ՏԻՄ բարեփոխումների թեման լավագույնս լուսաբանելու համար Համայնքների ֆինանսիստների միավորման եւ Երեւանի մամուլի ակումբի մրցանակին արժանացավ «Հետք» առցանց թերթի լրագրող Սառա Պետրոսյանը:

 Ծննդյան 60-ամյակի կապակցությամբ պարգեւատրվեցին ԵՄԱ փոխնախագահ Ավետ Դեմուրյանը եւ ԵՄԱ անդամ Զավեն Խաչիկյանը։