Վարչապետ Հովիկ Աբրահամյանն ընդունել է Եվրասիական տնտեսական միության խորհրդի անդամ, ագրոարդյունաբերական եւ արդյունաբերական հարցերով կոլեգիայի անդամ-նախարար Սերգեյ Սիդորսկիին:
Վարչապետը գոհունակություն է հայտնել ՀՀ կառավարության եւ ԵԱՏՄ հանձնաժողովի միջեւ ձեւավորված արդյունավետ համագործակցության մակարդակից եւ կարեւորել արդյունաբերության, գյուղատնտեսության, ինովացիոն եւ այլ բնագավառներում փոխգործակցության հետագա ակտիվացումը եւ ընդլայնումը:
Իր հերթին, Սերգեյ Սիդորսկին անհրաժեշտ է համարել տարբեր ոլորտներում Հայաստան-ԵՏՄ համագործակցության հետագա զարգացումն ու ամրապնդումը: ԵՏՄ խորհրդի անդամը կարեւորել է տնտեսության տարբեր ճյուղերում համատեղ կոնկրետ ծրագրերի իրականացումը, ինչը կնպաստի ԵՏՄ անդամ-երկրների միջեւ կապերի սերտացմանն ու ընդլայնմանը:
Այդ համատեքստում զրուցակիցները քննարկել են ԵՏՄ շրջանակում Հայաստանի հետ համագործակցության խորացմանը վերաբերող մի շարք հարցեր: Կողմերը կարեւորել են առեւտրաշրջանառության ծավալների ընդլայնման նպատակով սահմանափակումների վերացումը, ինչը նոր թափ կհաղորդի միասնական շուկայում մրցակցության աճին:
