Հայաստանի ազգային հավաքականի հարձակվող Ռուսլան Կորյանը, ով վերջերս հեռացավ Տաշքենդի «Լոկոմոտիվից» վերադարձել է իր նախկին թիմ՝ «Լուչ-Էներգիա»: Այսպիսով ստացվեց, որ Կորյանը թիմից բացակայել է միայն կես տարի: NEWS.am-ի թղթակից Վերա Մարտիրոսյանի հետ զրույցում Կորյանը պատմեց, թե ինչու հեռացավ Ուզբեկստանից եւ վերադարձավ նախկին թիմ:

Ռուսլան, ինչո՞ւ վերադարձար «Լուչ- Էներգիա»:
Մի քանի տարբերակ ունեի, թե ուր կարող էի տեղափոխվել: Բայց այն վերաբերմունքը, որ կար իմ հանդեպ Վլադիվոստոկի թիմի մարզիչների եւ երկրպագուների կողմից, չէր կարող չազդել իմ ընտրության վրա: Այն, ինչպես ինձ դիմավորեցին երկրպագուները երեկ, ես շատ եմ գնահատում եւ ինձ համար դա շատ բան է նշանակում:
Ինչո՞ւ հեռացար «Լոկոմոտիվից»:
«Լոկոմոտիվի» հետ շրջանը կյանքիս  լրիվ առանձին պատմություն է: Ես շատ շնորհակալ եմ թիմին այս կես տարվա համար, որ այնտեղ անցկացրի, բայց երբ թիմը դուրս չեկավ  Չեմպիոնների լիգայի խմբային փուլից, ես որոշեցի հեռանալ: Դա միայն իմ որոշումն էր:
Ի՞նչը քեզ այնտեղ դուր չէր գալիս:
Ոչինչ էլ դուր չէր գալիս: Այդ պատճառով այս հարցն անպատասխան կթողնեմ:
Քանի՞ տարվա պայմանագիր ես կքնել «Լուչ-Էներեգիայի» հետ:
Մեկ տարվա պայմանագիր:
Երբ հեռանում էիր «Լուչ Էներգիայից», ասացիր, որ շատ դժվար է խաղալ Վլադիվոստոկի պես հեռու քաղաքում, բայց կրկին վերադարձար:
Այո, շատ դժվար է, բայց երբ այդ հեռուն դառնում է քո տունը, դժվարությունները մոռացվում են: Ես շատ շնորհակալ եմ Վլադիվոստոկին եւ երկրպագուներին, որոնք այդքան ջերմ ինձ ընդունեցին տնային հանդիպմանը:

Վերա Մարտիրոսյան/ Vera&Football