Մինչեւ 2017 թվականը Եվրասիական տնտեսական միությունում ուժի մեջ կմտնի Մաքսային նոր օրենսգիրքը: Այս մասին NEWS.am-ի թղթակցի հետ զրույցում տեղեկացրեց Եվրասիական տնտեսական հանձնաժողովի (ԵՏՀ) Արդյունաբերական քաղաքականության դեպարտամենտի տնօրեն Վլադիմիր Մալցեւը:
Դրանում մանրամասն հաշվի կառնվեն ոչ սակագնային կարգավորման հարցերը՝ ի հավելումն ներկայում գործող մաքսային դրույքաչափերի: Բացի այդ, հաշվի կառնվի ազատ տնտեսական գոտիներում գործող մաքսային արտոնությունների կարգը:
Այդ պատճառով որոշել են միանգամից դրանք չփոխել, այլ դրանց կարգավորումը ներառել Մաքսային օրենսգրքի նոր խմբագրության մեջ: Ներկայում դրա շուրջ աշխատանքներ են ընթանում:
«Յուրաքանչյուր ազատ տնտեսական գոտում հարկային արտոնություններն ամբողջությամբ կպահպանվեն, ընդ որում՝ բոլորի համար: Դա ազգային մարմինների իրավասությունն է: Ինչ վերաբերում է մաքսայինին, ապա դրանք կքննարկենք: Եվ, իհարկե, կփորձենք հաշվի առնել այն հանգամանքները, որոնք մեր պետությունները տվել են ազատ տնտեսական գոտում ընդգրկված իրենց ներդրողներին»,- հայտարարեց Մալցեւը:
