Արդարության և ժողովրդավարության Եվրոպայի հայկական ֆերդերացիայի նախագահ Գասպար Կարապետյանը դատապարտել է հուլիսի 20-ին քրդերով բնակցեված Սուրուչ թուրքական քաղաքում տեղի ունեցած ահաբեկչությունը՝ ցավակցություն հայտնելով զոհվածների ընտանիքներին և շուտափույտ ապաքինում մաղթելով հարյուրավոր վիրավորներին՝ գրում է «The Armenian Weekly»-ին:
«Այդ ահաբեկչական գործողությունն ըստ էության հրեշավոր է, եթե հաշվի առնենք, որ երիտասարդությունը հավաքվել էր Սուրուչում, որպեսզի կամավոր մեկներ Քոբանի և օգներ քաղաքը վերականգնել ԻԼԻՊ-ի կողմից ավիրելուց հետո: Մեր միտքը զոհվածների և հարյուրավոր վիրավորների ընտանիքների հետ է», – ասել է նա:
Կարապետյանն ընդգծել է, որ ողբերգությունը տեղի է ունեցել թուրքական իշխանությունների կողմից ԻԼԻՊ-ին բաց աջակցության պատճառով:
«Վաղ թե ուշ Էրդողանի քաղաքականությունը Սիրիայում ահաբեկիչների աջակցության հարցում շուռ է գալու նրա դեմ: Ցավոք, դա տեղի է ունենում հենց հիմա և զոհվում են անմեղ երիտասարդներ», –նշել է հայկական կազմակերպության ղեկավարը:
«Արդարության և ժողովրդավարության Եվրոպայի հայկական ֆերդերացիան իր բոլոր կազմակերպությունների հետ միասին միանում է Քրդստանի Ազգային կոնգրեսին, Ժողովուրդների դեմոկրատական կուսակցությանը, Եվրոպական սոցիալիստների կուսակցության և ողջ ժողովրդավարական աշխարհին, որպեսզի դատապարտի այս ահաբեկչությունը: Սա ժողովրդավարական ուժերի բարոյական պարտականությունն է՝ աջակցել քրդերին իրենց ժողովրդավարության և արդարության համար պայքարում», –հավելել է Գասպար Կարապետյանը:
Նշենք, որ Թուրքիայի տարբեր հատվածներից մի խումբ երիտասարդներ, ովքեր ձախակողման հեղափոխական հայացքներ ունեին և, ովքեր հանդես էին գալիս ահաբեկչության դեմ, ցանկանում էին մեկնել սիրիական Քոբանի քաղաք, սակայն Թուրքիայի իշխանությունները նրանց թույլ չէին տալիս անցնել սահմանը: Դրանից հետո նրանք հուլիսի 20-ին մամուլի ասուլիս էին հրավիրել Սուրուչ քաղաքում: Մամուլի ասուլիսի ժամանակ մահապարտ-ահաբեկիչը պայթեցրել է իրեն՝ սպանելով 32 մարդու: