Orange Armenia ընկերությունն իր բիզնեսը վաճառում է հայկական Ucom օպերատորին՝ կարեւորություն չտալով դրա սեփականատիրոջ անձին: Այս մասին այսօր՝ հուլիսի 22-ին, լրագրողներին հայտնել է Orange Armenia-ի գլխավոր տնօրեն Ֆրենսիս Ժելիբտերը: «Ինձ դա չի հետաքրքրում: Ես ավելի շատ անհանգստանում եմ մեր ընկերության բաժանորդների բարեկեցությամբ»,-հայտարարել է նա:
Ucom-ը վերջին տարիներին Հայաստանում ինտերնետային կապի խոշորագույն օպերատորներից մեկն է դարձել:
«Ընկերությունը մեզ գործարք է առաջարկել՝ ցանկանալով ընդլայնել իր բիզնեսը, եւ մենք համաձայնել ենք: Հաշվի առնելով մեր գործընկերների ծառայությունների որակը, կարծում եմ, դա բխում է մեր բաժանորդների շահերից»,-հայտարարել է նա` հավելելով, որ իրենց հեռանալը կապված չէ քաղաքականության հետ (այս տարվա հունվարից Հայաստանը ԵՏՄ անդամ է, իսկ հայաստանյան շուկայում գործող մյուս երկու ընկերությունները՝ Beeline-ը եւ «ՎիվաՍել-ՄՏՍ»-ն ռուսական կապիտալով ընկերություններ են-խմբ):
Այդուհանդերձ, ըստ Orange Armenia-ի գլխավոր տնօրենի, պատճառի ֆինանսական է:
«Այլ երկրներում, որտեղ մենք ներկայացված ենք, մենք բավարար քանակով բաժանորդներ ու եկամուտներ ունենք, որպեսզի շարունակենք զարգանալ առաջանցիկ տեմպերով, ինչպես մենք սովոր ենք: Եթե խոսենք ԱՊՀ երկրների մասին, ապա մենք ներկա ենք Մոլդովայում, բայց այնտեղ շուկայի 60 տոկոսը մերն է, իսկ այստեղ 17-18 տոկոսը»,-պարզաբանել է Ժելիբտերը:
Նշենք, որ գործարքի արժեքը չի նշվում, իսկ Ucom-ն իրավունք կստանա պահպանել Orange Armenia բրենդը առաջիկա 12 ամիսների համար:
