Հրաչյա Հարությունյանի Հայաստան տեղափոխման գործընթացը նորմալ ընթացքի մեջ է: Այս մասին NEWS.am-ի թղթակցի հետ զրույցում ասաց Արդարադատության նախարարի տեղակալ Վիգեն Քոչարյանը:
Նա նշեց, որ հայկական կողմը ուղարկել է բոլոր անհրաժեշտ փաստաթղթերը, դրանք այժմ ուսումնասիրության փուլում են, ՌԴ-ից դեռ պատասխան չեն ուղարկել: «Պետք է հաշվի առնել, որ այս գործընթացը բավականին ժամանակատար է, մասնավորապես՝ ՌԴ-ում դատապարտյալի փոխանցման հարցը լուծվում է դատական կարգով, երբ համապատասխան մարմինը դիմում է դատարան, վերջինս էլ, հաշվի առնելով մի շարք հանգամանքներ, որոշում է կայացնում: Հետեւաբար՝ շատ շուտ այս հարցի դրական լուծում ակնկալելը այդքան էլ ճիշտ չի լինի: Որպես այդպիսին՝ ՌԴ-ից դեռ պատասխան չենք ստացել, այս ամենը գտնվում է քննարկման փուլում»,-ասաց Վիգեն Քոչարյանը՝ հավելելով, որ դատապարտյալի փոխանցման համար ռուսական օրենսդրությունը որեւէ ժամկետ չի սահմանում:
Փոխնախարարը նաեւ նշեց, որ ռուսական կողմի հետ աշխատանքները շարունակվում են, հայկական կողմը ակնկալում է, որ այս հարցը դրականորեն կլուծվի: Վիգեն Քոչարյանը նաեւ նշեց, որ իրենց համապատասխան կառույցի աշխատակիցները մշտական կապի մեջ են Հրաչյա Հարությունյանի բարեկամների հետ՝ նրանց տրամադրելով անհրաժեշտ իրավաբանական խորհրդատվություններ:
Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել է Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել է, ավելի քան 40-ը՝ վիրավորվել:
Հետաքննության արդյունքում պարզվել է, որ բեռնատարը հարկ եղածի պես չի սպասարկվել, ինչի արդյունքում արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին: Մոսկվայի քաղաքային դատարանը Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանը անփոփոխ է թողել այդ դատավճիռը: