Ռուսաստանի նախագահ Վլադիմիր Պուտինը նյուֆաունդլենդ շնիկ է նվիրել ղրղզստանցի աշակերտուհի Դաշա Յաիցկային, հաղորդում է «Ինտերֆաքսը»:
5-րդ դասարանցի աղջիկը նամակ է գրել Պուտինին՝ խնդրելով իրեն հենց այդ ցեղատեսակի շնիկ նվիրել: «Շնիկին, որն ուզում էր Դաշան, երկար են փնտրել եւ գտել են Ղազախստանի կենդանիների բուծարանում: Շնիկին տեղափոխել են Ղրղզստան, իսկ այսօր առավոտյան նվիրել են աշակերտուհուն»,-ասել են Բիշքեքում ՌԴ դեսպանատանը:
Շնիկին Դաշային է փոխանցել այդ երկրում ՌԴ դեսպան Անդրեյ Կրուտկոն: Նշվում է, որ աղջիկը շանը կոչել է Դառ (նվեր):