Դերասանուհի Անի Երանյանի մասնակցությամբ հուլիսի 18-ին տեղի ունեցած վթարից տուժած Հայկ Մխիթարյանը հիշողությունը կորցրել է: Այս մասին NEWS.am-ի թղթակցին հայտնեցին Հայկի ծնողները:
«Հայկը մեզ չի հիշում, դեպքի մասին որտեղի՞ց հիշի: Երբ տղաս կլավանա, իրեն հարցեր տվեք: Ինքը կորոշի խոսել, թե չէ: Մենք ոչ մի բանից տեղյակ չենք»,- ասաց Հայկի հայրը:
Հարցին, թե իրենք ոստիկանություն բողոք ներկայացնելու են, թե ոչ, Հայկ Մխիթարյանի ծնողները չցանկացան պատասխանել եւ անջատեցին հեռախոսը:
Հիշեցնենք, որ Հայկ Մխիթարյանը, որը վթարի պահին եղել է Անի Երանյանի ավտոմեքենայում, դեռեւս գտնվում է «Էրեբունի» բժշկական կենտրոնի Վերակենդանացման բաժանմունքում: Նրա վիճակը կայունացել է:
Հիշեցնենք, որ դերասանուհի Անի Երանյանը 2015թ. հուլիսի 18-ին իր վարած «Հունդայի» մակնիշի մեքենայով վթարի է ենթարկվել Գեղարքունիքի մարզի Ճամբարակից դեպի Սեւանի մայրուղի տանող ճանապարհին: Դերասանուհին վնասվածքներով տեղափոխվել էր Սեւանի բժշկական կենտրոն: Հիվանդանոց էր տեղափոխվել նաեւ նրա մեքենայի ուղեւոր Հայկ Մխիթարյանը, Իզաբելա Դանիելյանը:
Ավտովթարի հետեւանքով տուժել էր նաեւ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատավոր Գագիկ Պողոսյանը, նրա կինը՝ Մարինե Կարապետյանը, նրանք եւս դիմել էին հիվանդանոց: Դեպքի առթիվ նյութեր են նախապատրաստվում:
Նշենք, որ վթարի մասնակից, դատավոր Գագիկ Պողոսյանն ավելի վաղ մեզ հետ զրույցում նշել էր, որ Անի Երանյանի դեմ բողոք չի ներկայացնելու: