Հայաստանի Տրանսպորտի եւ կապի նախարարությունը մեղմացրել է հեռուստացույցների համար նախատեսված թվային դեկոդերների գնման ապագա մրցույթի պահանջները: Համապատասխան որոշումը կառավարությունն ընդունել է այսօր՝ հուլիսի 23-ին, իր նիստում: Դեկոդերները կհատկացվեն անապահով ընտանիքներին, որպեսզի հնարավորություն տրվի նրանց միանալ թվային հեռուստատեսությանը:
Առաջին մրցույթը, որը կայացել է մի քանի ամիս առաջ, չեղյալ է հայտարարվել, որովհետեւ մասնակիցներից ոչ մեկը չի համապատասխանել պահանջվող պայմաններին, մասնավորապես, նմանատիպ սարքավորումներ ներկրելու փորձի վերաբերյալ:
Հայկական ընկերությունների դեպքում նման պատճառն օբյեկտիվ է, քանի որ նրանք երբեք նախկինում նման մասշատբներով սարքավորումներ չեն ներկրել Հայաստան, իսկ արտասահմանյան ընկերությունները մրցույթին մասնակցելու հետաքրքրություն հանդես չեն բերել: Արդյունքում, որոշվել է հանել նման գործարքների երեք տարվա փորձ ունենալու մասին պահանձջը:
