Բելգիայի Ներկայացուցիչների պալատի լիագումար նիստում հուլիսի 23-ին քվեարկությամբ ընդունվել է Հայոց ցեղասպանության մասին բանաձեւը։ Բանաձեւին կողմ են քվեարկել Ներկայացուցիչների պալատի 124 անդամներ, դեմ՝ ոչ ոք, 8 պատգամավոր ձեռնպահ է քվեարկել։
Ընդդիմությունը քննադատել է, թե անհրաժեշտ էր ավելի միանշանակ փաստաթուղթ, բայց, հաշվի առնելով, որ վարչապետ Շառլ Միշելը խորհրդարանում ճանաչել է Հայոց ցեղասպանության փաստը, կողմ է քվեարկել։
Ներկայացուցիչների պալատը վերջին օրերին բուռն քննարկումներ է արել բանաձեւի վերաբերյալ, պատգամավորները նշել են Հայոց ցեղասպանության ճանաչման անհրաժեշտությունը:
Լսումների ընթացքում նաեւ քննադատություն էր հնչել Բելգիայի ԱԳՆ-ի հասցեին, քանի որ այն ներկայացուցիչներ չէր ուղարկել Հայոց ցեղասպանության 100-րդ տարելիցին նվիրված միջոցառումներին:
Բելգիայի վարչապետ Շառլ Միշելը հուլիսի 18-ին Ներկայացուցիչ պալատում կառավարության անունից ճանաչել էր Հայոց ցեղասպանությունը: «Կարծում եմ, որ 1915-1917 թվականների ողբերգական իրադարձությունները, որոնք նախաձեռնել է Օսմանյան կայսրության վերջին կառավարությունը, պետք է որակվեն որպես ցեղասպանությունը»,- ասել էր Շառլ Միշելը:
Հիշեցնենք, որ Բելգիայի Սենատը 1998 թվականին արդեն ճանաչել է Հայոց ցեղասպանությունը՝ համապատասխան բանաձեւ ընդունելով: