Եթե Սահմանադրության նախագիծն ընդունվի, քաղաքացին է ընտրելու, թե որ պատգամավորը կլինի խորհրդարանում։ Այս մասին NEWS.am-ի թղթակցի հետ զրույցում ասաց ԱԺ ՀՀԿ խմբակցության պատգամավոր Արտակ Դավթյանը՝ պատասխանելով հարցին, թե ինչ երաշխիքներ կան, որ նոր խորհրդարանում կլինեն բացառապես «արդյունավետ» պատգամավորներ։
«Ընտրողն է որոշում, ցուցակը որեւէ նշանակություն չունի։ Ես այդպես եմ կարծում, որովհետեւ կոնկրետ ընտրողն է ձեւավորում ընտրակարգը, ինչպես նաեւ ենթադրվում է, որ համամասնական ընտրությունները վարկանշային ձեւաչափով կանցկացվեն։ Սա արդեն նշանակում է, որ եթե համապատասխան պատգամավորը հավաքեց անհրաժեշտ քանակությամբ քվե, ապա նրան կտեսնենք խորհրդարանում, հակառակ պարագայում չենք տեսնի»,- ասաց ՀՀԿ-ական պատգամավորը։
Հիշեցնենք, որ արդեն հրապարակվել են Սահմանադրության նոր նախագծի առաջին յոթ գլուխները։ Նախագծով նախատեսվում է անցում կառավարման խորհրդարանական համակարգին։ Նախատեսվում է նաեւ հարյուր տոկոսանոց համամասնական ընտրակարգ։
