Վերջին օրերին սահմաններին որոշակի լարվածություն կա, կրակոցների թիվն ավելացել է, հակառակորդը ոչ միայն Արցախում, այլև ՀՀ սահմանամերձ բանակավայրերի ուղղությամբ է կրակում, այդ թվում` խոշոր տրամաչափի ականանետերից։ Այս մասին այսօր` հուլիսի 24–ին, լրագրողներին ասաց ՀՀ պաշտպանության նախարար Սեյրան Օհանյանը` հակառակորդի ակտիվությունը բացատրելով մի քանի տարբեր հանգամանքներով։
«Լարվածության վրա ազդում են թե ներքաղաքական, թե միջազգային զարգացումները, որոնք կան տարածաշրջանում, միջազգային արենայում, նաեւ հակառակորդի մոտ ներքաղաքական ու ներտնտեսական որոշակի պայմանները»,– ասաց Սեյրան Օհանյանը:
Դիմելով հայ ժողովորդին` նախարարը կոչ արեց վստահ լինել, որ հայկական բանակն կատարել եւ կատարելու է իր առջև դրված խնդիրը` ապահովել հարազատների խաղաղությունը։
«Իրավիճակը թե ԼՂ տարածքում, և թե Հայաստանի սահմաններին վերահսկվում է հայկական ստորաբաժանումների կողմից ։ Այսօր հայ զինվորն ունի բարձր մարտական ոգի, հայկական բոլոր ստորաբաժանումները օժտված են համապատասխն բարոյահոգեբանական վիճակով, և իրենց առջև դրված խնդիրներն իրականացնում են»,– ասաց Սեյրան Օհանյանը։
