Թուրքիայի մի շարք գավառներում փողոցային անկարգություններ են սկսվել՝ կապված Թուրքիայի զինված ուժերի կողմից Հյուսիսային Իրաքում Քրդական աշխատավորական կուսակցության (ՔԱԿ) զինյալների դեմ ռազմական գործողությունների հետ:
Ըստ Anadolu գործակալության, թուրքական բանակի գործողությունների դեմ բողոքող քրդերը Մարդինում քարեր, դյուրավառ հեղուկով լի շշեր են նետել ոստիկանների ուղղությամբ: Նրանք նաեւ ոստիկանական մեքենաներ եւ բանկոմատներ են հրդեհել: Անկարգությունների մասնակիցներին ցրելու համար ոստիկանությունն արցունքաբեր գազ եւ ջրանետ է կիրառել:
ՌԻԱ Նովոստիի փոխանցմամբ, ոստիկանների դեմ հարձակումներ են գրանցվել նաեւ Շըրնաք գավառ Ջիզրե քաղաքում: Իսկ Թուրքիայի արեւմտյան Իզմիր քաղաքում ցուցարարները երկու ավտոբուս են կանգնեցրել, ինչից հետո այրել են դրանցից մեկն ու կոտրել մյուսի ապակիները: Ուղեւորներին հաջողվել է լքել ավտոբուսները, ոչ ոք չի տուժել:
Թուրքիայում վերջին շաբաթվա ընթացքում իրադրությունը կտրուկ սրվել է՝ Սիրիայի հետ սահմանային Սուրուչ քաղաքում «Իսլամական պետության» կողմից իրականացված ահաբեկչությունից եւ երկրի հարավ-արեւելյան գավառներում ոստիկանների սպանությունից հետո, որի պատասխանատվությունը ստանձնել է ՔԱԿ-ը:
