Մեքսիկայի Իգուալա քաղաքում 60 հատ եղբայրական գերեզման են հայտնաբերել։ Գերեզմաններն ի հայտ են եկել անցյալ սեպտեմբերին անհետացած ուսանողների որոնման աշխատանքների արդյունքում։ Գերեզմաններում ընդհանուր առմամբ գտել են 129 դի։

Այս մասին, AP գործակալության հարցմանն ի պատասխան, պաշտոնական հաղորդագրություն է տարածել Մեքսիկայի գլխավոր դատախազությունը։

Ուսանողներն անհետացել էին 2014թ. սեպտեմբերի 26-ին՝ Իգուալա քաղաքում ոստիկանության հետ բախումներից հետո, գրում է Ռուսական ծառայությունը։ Ցուցարարների մի մասին ոստիկանները տարել էին, եւ, ըստ հետաքննության տեղեկությունների, հանձնել թմրամկարտելների գրոհայինների ձեռքը։

Սեպտեմբերին բռնկված բախումների պատճառով զոհվել էր 6 մարդ, վիրավորվել 17-ը, իսկ 57 ուսանող անհետ կորած էր համարվում։ Նրանցից 14-ն ավելի ուշ տուն էին վերադարձել։

Ցուցմունք տված ոստիկանները պնդում են, որ ուսանողների վրա հարձակումն իրականացրել է քաղաքապետը, որին դուր չէին եկել բողոքի ցույցերը։