Սիսիան-Մեղրի ավտոճանապարհին հուլիսի 23-ին տեղի ունեցած ողբերգական վթարի հետեւանքով վիրավորված 2-ամյա Հարությունը դուրս է գրվել հիվանդանոցից: Այս մասին NEWS.am-ի թղթակցին հայտնեցին «Սուրբ Աստվածամայր» բժշկական կենտրոնից:
Նրանց փոխանցմամբ՝ փոքրիկը մի քանի օր բուժում է ստացել կենտրոնի նյարդավիրաբուժական բաժանմունքում, ապա դուրս գրվել:
Նշենք, որ ողբերգական վթարի հետեւանքով մահացել էր 2-ամյա Հարությունի քույրիկը, իսկ մայրն ու պապիկը տեղափոխվել էին հիվանդանոց. նրանց վիճակը կայուն է:
Ավելի վաղ ՏԿԱԻՆ մամուլի ծառայությունը հայտնել էր, որ 2015թ. հուլիսի 23-ին, ժամը 12.39-ին ահազանգ է ստացվել, որ Սիսիան-Մեղրի ավտոճանապարհի 18-րդ կմ-ին տեղի է ունեցել ավտովթար: Սիսիան-Գորիս ավտոճանապարհահատվածում բախվել են «Մերսեդես» եւ «Օպել» մակնիշի ավտոմեքենաները: Վթարի հետեւանքով կա 4 զոհ եւ 3 վիրավոր:
Դեպքի առթիվ հարուցվել է քրեական գործ Քրեական օրենսգրքի 242-րդ հոդվածի 3-րդ մասի հատկանիշներով՝ Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ: