Հուլիսի 20-ին, ժամը 15-ին, ոստիկանության Մասիսի բաժին է դիմել Իրանի մի քաղաքացի եւ հայտնել, որ ժամեր առաջ գողացել են իր եւ եւս երկու իրանցիների ճամփորդական պայուսակները, որտեղ եղել է հագուստ, 800 դոլար եւ փաստաթղթեր:
Ոստիկանության մամուլի ծառայությունից հայտնում են, որ դեպքը տեղի էր ունեցել Արարատի մարզի Մարմարաշեն գյուղի տարածքում գործող գազալցակայանում: Ըստ նախնական վարկածի, կասկածյալը տաքսու վարորդն էր, որը իրանցիներին հարավային սահման հասցնելու փոխարեն նրանց զրկել են ճանապարհը շարունակելու բոլոր հնարավորություններից:
Ոստիկանները տաքսու վարորդին՝ 30-ամյա Հրաչ Գ.-ին, հայտնաբերել ու բերման են ենթարկել: Նրա մեքենայից հայտնաբերվել է տուժողներին պատկանող իրերը, բացի փողից:
Նախապես Հրաչ Գ.-ն իրանցիների հետ պայմանավորվել է 100 դոլարի դիմաց հասցնել Իրանի սահման, սակայն ճանապարհին որոշել է անցնել «պլան B»-ին: Գազ լիցքավորելու պատրվակով նա կանգ էր առել գազալցակայաններից մեկում եւ խնդրել ուղեւորներին սպասել սպասասրահում: Հետո շրջվել էր ու սրընթաց շարժվել Երեւանի ուղղությամբ:
Փաստի առթիվ հարուցվել է քրեական գործ:
