Հայ ազգային կոնգրեսը սերտորեն համագործակցում է եւ շարունակելու է համագործակցել Սոցիալ-դեմոկրատ Հնչակյան կուսակցության Հայաստանում գործող կառույցի հետ: Այս մասին NEWS.am-ի թղթակից հետ զրույցում ասաց ՀԱԿ-ի մամուլի խոսնակ Արման Մուսինյանը, մենկաբանելով ՍԴՀԿ կենտրոնական վարչության հայտարարությունը, որով նա խզում է իր հարաբերությունները ՀԱԿ-ի հետ:
«Ինչ վերաբերում է կուսակցության Սփյուռքում գործող կառույցներին, ապա ՀԱԿ-ը միշտ բաց է եղել նրանց հետ համագործակցության համար»,- նշել է Մուսինյանն ու ընդգծել, որ կուսակցության այսօրվա հայտարարությունն ու այնտեղ ՀԱԿ-ի հասցեին արված մեղադրանքները իր համար անհասկանալի են:
Նշենք, որ այսօր ՍԴՀԿ կենտրոնական վարչությունը հայտարարություն է տարածել, որով անհնարին է համարել ՀԱԿ-ի հետ համագործակցությունը, քանի որ այդ կազմակերպությունը նպաստում է կուսակցության պառակտմանը: Նշվել է նաեւ, որ ՍԴՀԿ-ն մտադիր չէ դառնալ որեւէ ուժի, այդ թվում նաեւ ՀԱԿ-ի կցորդը:
Այս հայտարարությանը հետեւել է ՍԴՀԿ հայաստանյան կառույցի ատենապետ Լյուդմիլա Սարգսյանի մեկնաբանությունը, որտեղ նա, մասնավորապես հայտարարել է, որ հնչակյանները մնում են Կոնգրեսի կազմում եւ սերտորեն համագործակցելու են այդ կառույցի հետ:
Նշենք, որ հնչակյանների շարքերում պառակտումից հետո առաջ է եկել երկու թեւ: Նրանցից մեկը ղեկավարում է Գեւորգ Պերկուպերկյանը, մյուսը` Լյուդմիլա Սարգսյանը: Այդ թեւերից իրավաբանորեն գրանցված է միայն Լյուդմիլա Սարգսյանի գլխավորած թեւը: