Հուլիսի 28-ին ՀՀ էկոնոմիկայի նախարար Կարեն Ճշմարիտյանն ընդունել է Հայաստանի Հանրապետությունում Բելառուսի Հանրապետության արտակարգ եւ լիազոր դեսպան Ստեփան Սուխորենկոյին, ով ավարտում է իր դիվանագիտական առաքելությունը Հայաստանում:
Հանդիպմանը մասնակցել են նաեւ Հայաստանում Բելառուսի Հանրապետության դեսպանության տնտեսական հարցերով խորհրդական Դմիտրի Սեմինովիչը, ՀՀ էկոնոմիկայի նախարարության աշխատակազմի միջազգային տնտեսական համագործակցության վարչության պետ Ալեքսանդր Ավետիսյանը, արդյունաբերության զարգացման վարչության պետ Արմեն Եգանյանը, տեխնոլոգիական զարգացման վարչության պետ Ռուբեն Գեւորգյանը, ինչպես նաեւ նախարարության այլ աշխատակիցներ եւ ներկայացուցիչ ԱԳՆ-ից:
Ջերմորեն ողջունելով հյուրերին` նախարար Ճշմարիտյանը շնորհակալություն է հայտնել դեսպան Սուխորենկոյին պաշտոնավարման ընթացքում մեր երկրների միջեւ սերտ հարաբերությունների զարգացմանն ուղղված բացառիկ աշխատանքի համար եւ հույս է հայտնել, որ այդ հարաբերությունները կունենան արդյունավետ շարունակություն եւ կնպաստեն փոխադարձ հետաքրքրություն ներկայացնող ոլորտներում երկկողմ համագործակցության ընդլայնմանը:
Հայաստանի Հանրապետությունում Բելառուսի Հանրապետության արտակարգ եւ լիզոր դեսպան Ստեփան Սուխարենկոն իր հերթին շնորհակալություն է հայտնել Կարեն Ճշմարիտյանին հայ-բելառուսական համագործակցության խորացման հարցում մեծ դերակատարում ունենալու համար եւ հույս հայտնել, որ համատեղ ջանքերը կտան դրական արդյունքներ Բելառուսի եւ Հայաստանի առեւտրատնտեսական հարաբերությունների հետագա խորացման ուղղությամբ:
