Եվրասիական տնտեսական հանձնաժողովը (ԵՏՀ) եւ ագրոարդյունաբերական համալիրի հարցերով զբաղվող Ռուսաստանի արդյունահանողների ու ձեռներեցների միության հանձնաժողովը (ՌԱՁՄ) կազմակերպել են միացյալ կլոր սեղան քննարկում ՝ նվիրված Եվրասիական տնտեսական միության (ԵՏՄ) երկրների գյուղատնտեսական արտադրանքի մրցակցության խնդիրներին։
ԵՏՀ մամուլի կենտրոնից NEWS.am-ին հաղորդել են, որ միջոցառմանը մասնակցել են ագրոբիզնեսի բնագավառի ավելի քան 60 ներկայացուցիչներ՝ Հայաստանից, Բելառուսից, Ղազախստանից եւ Ռուսաստանից։
ԵՏՀ-ի խորհրդի անդամ (նախարար) Սերգեյ Սիդորովսկին իր ողջույնի խոսքում նշել է, որ ԵՏՄ-ի գործող պայմանագրի հիմքում ընկած դրույթները հնարավորություն են ընձեռնում լուծել ԵՏՄ տարածքում գյուղատնտեսական արտադրանքի մրցակցության զարգացման խնդիրները։ «Ագրոարդյունաբերական համալիրի ռազմավարության օպտիմալ զարգացումը մշակելիս պետք է հիմնվել սեփական ուժերի եւ ռեսուրսների վրա, որոնք կուղղվեն գիտության լավագույն ձեռքբերումների օգտագործմանը, հայրենական արտադրության զարգացման խթանմանը: Բացի այդ, անդրսահմանային շուկաների տարածքներում անհրաժեշտ է ձեւավորել համագործակցությոն շղթաներ՝ ներմուծվող արտասահմանյան ռեսուրսները հայրենականով փոխարինելու ու հացահատիկի վերամշակման նպատակով», ասել է ԵՏՀ-ի նախարարը։ Նա նաեւ նշել է, որ ներկայումս գործարարության դերը շատ է բարձրացել, հետեւաբար՝ հանձնաժողովն առանց բիզնեսի խնդիրների համաձանեցման որոշումներ չի կարող կայացնել։
Կլոր սեղանի մասնակիցները նշել են, որ երկրների ագրոարդյունաբերական համալիրի զարգացման հիմքում պետք է ընկած լինի փոխշահավետ միջազգային համագործակցությունը, հաշվի առնելով ինտեգրացիոն գործընթացները, մասնակից առանձին երկրների ներքին զարգացումները, ինչպես նաեւ արտաքին քաղաքական իրավիճակը։ Նրանք այն կարծիքին են, որ մրցակցության եւ մասնագիտացման խնդիրները փոխկապակցված են։ Այդ իսկ պատճառով ԵՏՄ-ի երկրները պետք է լուծեն գյուղատնտեսական հիմնական արտադրանքի զարգացման ու համակարգման խնդիրները (միս եւ մսամթերք, կաթ եւ կաթնամթերք, շաքար եւ շաքարավազ եւ այլն)՝ նկատի ունենալով ավանդական մրցակցային առավելությունները, ներքին շուկայի ծավալը եւ արտահանման խթանումը։
«Առաջին հերթին պետք է հաշվի առնենք ժամանակակից ու արդյունավետ կերի ու կերային հավելումների արտադրության, ինչպես նաեւ քիմիական նյութերի խթանման հարցերը (անասնաբուժական դեղեր, բույսերի պաշտպանության միջոցներ)», ասել է Սերգեյ Սիդորովսկին։
Ագրոբիզնեսի ներկայացուցիչները առաջարկել են մշակել ներդաշնակեցման կանոնների կառավարման հարցերը։ Մասնակիցները նաեւ եկել են համաձայնության, որ ԵՏՄ-յան գյուղատնտեսական արտադրանքի մրցունակությունը հարցում պետք է կիրառվեն նույն չափանիշները, որոնք գործում են աշխարհի երրորդ երկրների, ինչպես նաեւ արտաքին շուկաների համար։
Դրական գնահատելով կլոր սեղանի արդյունքները, մասնակիցները առաջարկել են անցկացնել ԵՏՀ-ի հետ պարբերական հանդիպումներ՝ ագրոբիզնեսի զարգացման, ինտեգրման եւ մրցունակցության խնդրիների շուրջ լուծումներ մշակելու նպատակով։
