Եվրոպայի խորհրդի գլխավոր քարտուղար Տուրբյորն Յագլանդը Եվրոպայի խորհրդի 9 անդամ երկրներին, այդ թվում՝ Հայաստանին կոչ է արել վավերացնել կանանց նկատմամբ բռնության դեմ պայքարի եւ նախազգուշացման մասին Ստամբուլի կոնվենցիան։
Կոնվենցիան ուժի մեջ է մտել 2014թ. օգոստոսի 1-ին եւ նորարարական է, քանի որ քրեական պատասխանատվություն է նախատեսում կանանց նկատմամբ ցանկացած բռնության համար՝ սեռական բռնությունից եւ բռնաբարությունից մինչեւ հետապնդում եւ գործընկերների կողմից սեռական ոտնձգություններից մինչեւ հոգեբանական բռնություն։
Նա հիշեցրել է, որ Ստամբուլի կոնվենցիայի համաձայն՝ պետությունները ոչ միայն պարտավոր են հետապնդել մեղավորներին, այլ նաեւ ապահովել զոհի պաշտպանությունը եւ միջոցներ ձեռնարկել, որոնք առաջին հերթին կարող են օգնել կանխել բռնությունը։
Եվրոպայի խորհրդի գլխավոր քարտուղարը գովաբանել է 20 անդամ պետություններին, որոնք ստորագրել են փաստաթուղթը այն վավերացնելու մտադրությամբ։ «Միայն 9 պետություն դեռեւս չի ստորագրել այն՝ Հայաստանը, Ադրբեջանը, Բուլղարիան, Չեխիայի Հանրապետությունը, Իռլանդիան, Լատվիան, Լիխտենշտեյնը, Մոլդովայի Հանրապետությունը եւ Ռուսաստանի Դաշնությունը։ Ես նրանց կոչ եմ անում անհապաղ կատարել դա»,- ասել է Յագլանդը։