ԱԻՄ առաջնորդ Պարույր Հայրիկյանը վաղը՝ հուլիսի 31-ին, կհանդիպի Սահմանադրական բարեփոխումների հանձնաժողովի անդամների հետ։ Այս պատճառով ԱԻՄ առաջնորդը չեղյալ է հայտարարել բարեփոխումների դեմ բողոքի երթը Մատենադարանից դեպի Սահմանադրական դատարան, որը պետք է տեղի ունենար այսօր՝ հուլիսի 30-ին։
Լրագրողների հետ զրույցում Հայրիկյանը նշեց, որ իրեն զանգահարել են Սահմանադրական դատարանից եւ հրավիրել քննարկման, ինքն էլ հրավերն ընդունել է:
«Այսօր երթով այնտեղ գնալը կդիտվի որպես մանկամտություն: Հանդիպումը լինելու է Սահմանադրական բարեփոխումների հանձնաժողովի անդամների հետ: Ես նրանցից պահանջելու եմ այն արձանագրությունը, որում գրված է, որ իրենք քննարկել են ԱԻՄ-ի ներկայացրած Բացարձակ ժողովրդավարության հայեցակարգը եւ այն մերժելի են համարել ինչ-ինչ պատճառներով: Կամ էլ թող ասեն, որ չեն քննարկել եւ վերջ»,- ասաց նա:
Պարույր Հայրիկյանը նաեւ նշեց, որ Սահմանադրական բարեփոխումների առաջարկված նախագծի քննարկումներին մասնակցողները արջի ծառայություն են մատուցում իշխանություններին:
«Մենք համոզված լինելով, որ պետականորեն ներկայացրած նախագիծը քննարկման ենթակա չէ, չենք մասնակցում այդ քննարկումներին: Նա, ով կմասնակցի այդ քննարկումներին, ուղղակիորեն արջի ծառայություն կմատուցի իշխանություններին: Պետք է մերժել, եւ վերջ: Եթե նրանք կարծում են, որ ժողովրդի իրավունքները կկրճատվեն, որ իրենք տղերքով լավ զգան իրենց, ապա այստեղ քննարկելու ոչինչ չկա»,– ասաց Հայրիկյանը։