Թբիլիսիի հայերի միության նախագահ Դավիթ Մանուսաջյանը մահացել է հոսանքահարումից: Այս մասին NEWS.am-ի թղթակցին ասաց Վրաստանի նախկին նախագահի խորհրդական, «Վրաստան» թերթի խմբագիր Վան Բայբուրթյանը:
«Աշխատանքի վայրում զգույշ չի եղել եւ հոսանքը խփել է: Ընդամենը 48 տարեկան էր, վերջին երկու տարիներին էր նշանակվել Թբիլիսիի հայերի միության նախագահ»,- ասաց Վան Բայբուրթյանը՝ հավելելով, որ Մանուսաջյանի հուղարկավորությունը տեղի կունենա օգոստոսի 2-ին Թբիլիսիում:
Նշենք, որ Դավիթ Մանուսաջյանն ուներ 4 երեխա:
Ավելի վաղ Ռուսաստանի հայերի տպագիր մարմնի տեղեկատվական կենտրոն «Երկրամաս»-ը հաղորդել էր, որ Թբիլիսիում հուլիսի 29-ին դժբախտ պատահարից 48 տարեկան հասակում մահացել է հայ հասարակական գործիչ, Թբիլիսիի հայերի միության նախագահ Դավիթ Մանուսաջյանը: