Թուրքիայում Իտալիայի նախկին դեսպան Կառլո Մարսիլին իտալական Տրենտո քաղաքում թուրք դիվանագետների մասնակցությամբ կայացած սեմինարի ժամանակ հրապարակայնորեն ստել է Հայոց ցեղասպանության եւ հայ-թուրքական արձանագրությունների մասին: Այս մասին գրում է իտալական Il Giornale պարբերականը:
«Հայաստանի եւ Թուրքիայի հարաբերությունները հաստատվեցին ԽՍՀՄ փլուզումից հետո: Լեռնային Ղարաբաղում ճգնաժամից հետո հետագա սցենարները սառեցվեցին: Սակայն Հայաստանի եւ Թուրքիայի շփման ուղիները միշտ բաց են եղել: Պատահական չէ, որ Ստամբուլի եւ Երեւանի միջեւ ուղիղ չվերթներ կան, ավելին, մի քանի տարի առաջ մենք աջակցեցինք, այսպես կոչված «ֆուտբոլային դիվանագիտությանը»,- հայտարարել է Մարսիլին՝ հավելելով, որ Հայաստանի խորհրդարանը, «ցավոք, չվավերացրեց այդ համաձայնությունները»:
Նշենք, որ Հայաստանի Ազգային ժողովն արձանագրությունները խորհրդարանում պահեց 6 տարի եւ հետ կանչեց միայն 2015 թվականի փետրվարին՝ տեսնելով, որ Թուրքիայի Մեջլիսը ոչինչ չի անում դրանք վավերացնելու ուղղությամբ: Միաժամանակ, Հայաստանն ավելի վաղ ընդառաջ քայլ արեց. 2010 թվականի հունվարին Սահմանադրական դատարանն արձանագրությունները Սահմանադրությանը համապատասխանող ճանաչեց ու թույլատրեց խորհրդարան մտցնել:
Մարսիլին սեմինարի ընթացքում եւս մեկ արտահայտություն է թույլ տվել: «Խնդիրը, այսպես կոչված, հայերի ցեղասպանության ճանաչման մեջ է, որը հակասում է պատմաբանների տեսակետին: Սակայն որոշ ազդեցիկ շրջանակներ, հատկապես՝ Սփյուռքում, այն կարեւոր պայման են համարում Թուրքիայի հետ երկխոսությունը վերականգնելու համար: Աբսուրդ է այդ հարցում պետության հստակ դիրքորոշում պահանջելը: Իտալիան, ինչպես եւ Վաշինգտոնը, պաշտոնապես չեն ճանաչել ցեղասպանությունը»,- հայտարարել է իտալացի դիվանագետը:
Հիշեցնենք, որ Իտալիայի խորհրդարանի Ստորին պալատը Հայոց ցեղասպանությունը ճանաչող բանաձեւ է ընդունել դեռեւս 2000 թվականի նոյեմբերին: