Ամերիկյան Նյու Մեքսիկո նահանգում պայթյուններ են տեղի ունեցել երկու եկեղեցիների մոտ: Այս մասին հաղորդում է Gazeta-ն՝ վկայակոչելով NBC News-ը:
Լաս Քրուսես դեպարտամենտի ոստիկանության տվյալներով, պայթյունների հետեւանքով ոչ ոք չի տուժել: Բացի այդ, ոստիկանությունը պայթյունները որակել է որպես «համեմատաբար ոչ զգալի»:
Առաջին պայթյունը կազմակերպվել է առավոտյան բապտիստական եկեղեցում, որտեղ չարագործները պայթուցիկ սարքը թաքցրել էին շենքի մոտ գտնվող փոստարկղում: Դրանից կես ժամ անց Սուրբ Խաչի կաթոլիկ եկեղեցու մոտ աղբարկղ է պայթել:
Դեպքից հետո եկեղեցում գտնվողներին տարհանել են, իսկ եկեղեցին ողջ օրը փակ է մնացել: Ներկայումս իրավապահ մարմինները հետաքննում են պայթյունների պատճառները, նաեւ փնտրում են դրանց կազմակերպիչներին: