Թուրքիայի երկու արեւելյան նահանգի մի շարք շրջաններ անվտանգության գոտիներ են հայտարարվել՝ Քրդական բանվորական կուսակցության (PKK) անդամների հաճախակի դարձած հարձակումների պատճառով։ Այս որոշման մասին երկուշաբթի օրը հաղորդել են Ագր եւ Թունջելի նահանգների վարչական մարմինները։
Թուրքական օրենսդրությամբ նախատեսված է, որ անհրաժեշտության դեպքում որոշ շրջաններ կարող են անվտանգության գոտի հռչակվել։ Նման շրջաններում փաստացիորեն ռազմական դրություն է մտցվում, քաղաքացիական անձանց արգելվում է չարտոնված մուտք գործել այդ շրջաններ, իսկ բանակը եւ ժանդարմերիան իրավունք են ստանում կրակ բացել ցանկացած կասկածելի թիրախի ուղղությամբ։ Նմանատիպ գոտիներ գործում են երկրի հարավ-արեւելյան մի շարք շրջաններում, որոնք հարակից են Սիրիային եւ Իրաքին, փոխանցում է ՏԱՍՍ-ը։