BMW կոնցեռնը պատրաստվում է իր ավտոմեքենաները հագեցնել Connected Signals ընկերության EnLighten ծառայության հետ աշխատող համակարգչային ծրագրով: Այն թույլ է տալիս կանխագուշակել առաջիկա խաչմերուկի լուսակրի ազդանշանը: Այս մասին հաղորդում է BMW-ի ամերիկյան կայքում:

Դրա համար ծառայությունն օգտագործում է երթեւեկության կանոնակարգման «խելացի» համակարգերի տվյալները: Հիմնվելով ավտոմեքենայի արագության եւ դիրքի տվյալների վրա՝ համակարգը ցույց կտա, արդյո՞ք վարորդը կհասցնի անցնել կանաչ լույսի ներքո, թե՞ ավելի լավ է նվազեցնել արագությունը՝ խաչմերուկին կտրուկ արգելակումից խուսափելու համար:

Ըստ Gazeta-ի, առայժմ նման հնարավորությունից կկարողանան օգտվել iOS սարքերով BMW-ի վարորդները: EnLighten-ի աշխատանքի համար հարկավոր է ավտոմեքենայի գլխավոր համակարգիչը սինխրոնացնել սմարթֆոնի հետ: Համակարգն արդեն աշխատում է ԱՄՆ մի քանի քաղաքներում, այդ թվում՝ Փորթլենդում եւ Սոլթ Լեյք Սիթիում: