Հունիսի 20-ին, ոստիկանության Մասիսի բաժին է դիմել Արմավիրի մարզի Արևշատ գյուղի մի բնակիչ և հայտնել, որ գիշերը հափշտակել են իր «Մերսեդեսի» հետևի համարանիշն ու սրահում տեղադրված հեռուստացույցի էկրանը:
Նրա պատմելով` դեպքը տեղի էր ունեցել ժամը 02:30-ի սահմանում` Գեղանիստ գյուղի տարածքում: Մասիսի ոստիկանների իրականացրած միջոցառումների արդյունքում պարզվեց, որ հիշյալ ժամին տուժողը ավտոմեքենան վարելու հարցի շուրջ վիճաբանության մեջ էր մտել ինչ-որ անծանոթների հետ: Վեճն արագ վերածվել էր կռվի, որի ընթացքում գործածվել էին մետաղյա իրեր և դանակ: Արդյունքում ոչ միայն տուժողներն էին մարմնական վնասվածքներ ստացել, այլև վնասվել էին մեքենաները:
Քրեական հետախույզները ձեռնարկել են համալիր գործողություններ «Ֆորդի» տերերին հայտնաբերելու ուղղությամբ: Իրավապահներին հաջողվել է ի վերջո տեղեկություններ ստանալ կասկածյալների մասին:
Պարզվել է, որ հիշյալ օրը տուժողի հետ վիճաբանել էին Երևան քաղաքի բնակիչներ Վարդան Խոսրովյանը և նրա որդին` Աշոտ Խոսրովյանը: Նրանք հրավիրվել են ոստիկանության Մասիսի բաժին և տվել խոստովանական ցուցմունք:
Պարզվել է, որ հայր ու որդի գիշերը տուն վերադառնալիս են եղել, երբ երթևեկելու վերաբերյալ վեճ է ծագել տուժողի հետ: Հաշտության եզրեր չգտնելով` սկսել էին ծեծել իրար: Նրանք վնասել էին տուժողի մեքենան, ապա բացահայտ հափշտակել մեքենայի սրահի էկրանը, մեքենայի հետևի համարանիշը և հեռացել:
Փաստի առթիվ հարուցվել է քրեական գործ, քննությունը շարունակվում է:
Մանրամասները ոստտիկանության պատրաստած տեսանյութում