Նորքի հեռուստաշտարակին կից անտառում բռնկված հրդեհի պատճառները կպարզի ՏԿԱԻՆ պետական հրդեհային եւ տեխնիկական անվտանգության տեսչությունը: Այս մասին NEWS.am-ի թղթակցին հայտնեցին ՏԿԱԻՆ Երեւանի փրկարարական վարչությունից:
Մեզ փոխանցեցին՝ քանի որ այդ տարածքում ռեստորան կամ այլ զվարճանքի կենտրոններ չկան, որպեսզի մտածենք, որ հրավառության արդյունքում է հրդեհը բռնկվել, ուստի՝ հակված են մտածել, որ պարզապես շոգ եղանակի պատճառով չոր խոտը այրվել է:
Սա այս տարածքում հրդեհի բռնկման առաջին դեպքը չէ: Առհասարակ, ՏԿԱԻՆ-ից փոխանցեցին, որ օր չկա, որ խոտածածկ տարածքներում հրդեհների դեպքերի մասին ահազանգեր չլինեն: «Կրակը տարածվում էր դեպի վերեւ՝ հեռուստաշտարակի ուղղությամբ, տարբեր ուղղություններով էր տարածվում, քամու ազդեցությունն էլ մյուս կողմից, այդ պատճառով հայտարարվեց ԲԻՍ-1 աստիճանի բարդության: Որեւէ մեկը չի կարող պնդել, թե որեւէ մեկը հրկիզել է այդ տարածքը, հնարավոր է ապակու, մետաղի կտոր է եղել, արեւի անդրադարձի շնորհիվ հրդեհ է բռնկվել»,-հայտնեցին ՏԿԱԻՆ-ից:
Ավելի վաղ հայտնել էինք, որ Հայաստանի ՏԿԱԻՆ-ում, օգոստոսի 3-ին, ժամը 22.00-ին ահազանգ է ստացվել, որ Երեւանի Սարի թաղի 8-րդ շարքի տներից մեկի մոտակայքում այրվում է խոտածածկույթ: Դեպքի վայր է մեկնել երկու մարտական հաշվարկ: Պարզվել է, որ հեռուստաաշտարակի մոտակայքում այրվում է մոտ 4 հա բուսածածկույթ: Դեպքի վայր է մեկնել ՃԿԱԿ ԱԻ արձագանքման խումբը եւ մեկ մարտական հաշվարկ: Հայտարարվել է հրդեհի բարդության «Բիս-1» աստիճան. դեպքի վայր է մեկնել եւս մեկ մարտական հաշվարկ: Հրդեհը մեկուսացվել է ժամը 23.59-ին, մարվել` 00.10-ին:
