Երեւանի Մալաթիա-Սեբաստիա վարչական շրջանի քննչական բաժնի ավագ քննիչը ենթարկվել է կարգապահական պատասխանատվության՝ նախաքննության ընթացքում վկայի միջնորդությունը սահմանված ժամկետներում չքննարկելու համար: Այս մասին հայտնում են Քննչական կոմիտեի մամուլի ծառայությունից:
Նրանց փոխանցմամբ՝ ՔԿ ներքին անվտանգության վարչությունում կատարված ծառայողական քննությամբ պարզվել է, որ Մալաթիա-Սեբաստիա վարչական շրջանի քննչական բաժնի ավագ քննիչը ՀՀ քրեական օրենսգրքի 182-րդ հոդվածի 3-րդ մասի 2-րդ կետի հատկանիշներով (Շորթում, որը կատարվել է առանձնապես խոշոր չափերով) հարուցված քրեական գործի նախաքննության ընթացքում իր լիազորություններն իրականցնելիս առերեւույթ խախտել է ՀՀ քրեական դատավարության օրենսգրքի 199-րդ հոդվածով սահմանված նորմերը. այն է՝ 5-օրյա ժամկետում չի քննարկել սույն գործով վկայի միջնորդությունը եւ օրենքով սահմանված կարգով նրան չի պատասխանել:
Հիմք ընդունելով ՀՀ քննչական կոմիտեի կարգապահական հանձնաժողովի կարգապահական խախտման փաստի առկայության եւ կատարված խախտման մեջ քննչական կոմիտեի ծառայողի մեղավորության մասին որոշումը եւ ղեկավարվելով «ՀՀ քննչական կոմիտեի մասին» ՀՀ օրենքի 30-րդ հոդվածի 1-ին մասի 2-րդ կետի հատկանիշներով՝ ՀՀ ՔԿ նախագահը հրաման է ստորագրել՝ Մալաթիա-Սեբաստիա վարչական շրջանի քննչական բաժնի ավագ քննիչի նկատմամբ որպես կարգապահական տույժ «նկատողություն» կիրառելու վերաբերյալ:
