Ագարակում կրակոցներ արձակած Ստյոպա Հովհաննիսյանը քաղաքապետարանի հետ դատական քաշքշուկի մեջ է, եւ հենց այդ պատճառով էլ տեղի ունեցածի մեջ մեղադրում է քաղաքապետին: Այս մասին NEWS.am-ի թղթակցի հետ զրույցում ասաց Ագարակի քաղաքապետ Մխիթար Զաքարյանը:
Նա նշեց, որ Ստյոպա Հովհաննիսյանը կոնֆլիկտային մարդ է, սովոր է իր հարցերը կրակոցներով լուծել, զենքով է շրջում Ագարակում, երեւի այս անգամ այնպիսի մարդու է հանդիպել, որ այդ կրակոցից չի վախեցել: «Ինքը ապօրինի հողազավթում ունի, Չարենցի 28 շենքի հարեւանությամբ, որտեղ որ եղել է այդ դեպքը, զբոսայգու տարածքն է զավթել, 2010թ քղաաքապետարանը իր հետ դատական քաշքշուկի մեջ է, ուզում ենք զբոսայգին վերականգնենք, ապօրինի հողազավթում ունեցող 5 բնակչից 4-ը կամավոր համաձայնել են հանձնել, միայն ինքն է ընդդիմանում, վճիռը կա, մենք շահեցինք առաջին ատյանում, ինքը վերաքննիչում բեկանեց, նորից վճռաբեկ բողոք տարանք եւ այլն: Կարող է դրա համար է իմ անունը տվել, որ քաղաքապետի վրա ցեխ շպրտի»,-ասաց Մխիթար Զաքարյանը:
Նա նշեց, որ կրակոցներ արձակած մյուս անձին չի ճանաչում: Քաղաքապետի կարծիքով՝ հավանաբար մեքենան վարելու, իրար չզիջելու թեման է եղել վիճաբանության եւ կրակոցների պատճառ: Բարեբախտաբար, կրակոցները օդ են արձակել, եւ միջադեպի հետեւանքով տուժածներ չկան: «Անասունություն են արել, ժողովրդի մեջ, քաղաքի մեջ երկու հատ օդ են կրակել, ես դա անձնական վիրավորանք եմ համարում իմ հանդեպ, երեւի էն մեկն ուզել է ասի՝ ես զենք ունեմ, էն մեկն էլ, թե չեմ վախենում, ես էլ ունեմ, այսպես ապուշություն էլի»,-ասաց քաղաքապետը:
Ավելի վաղ հայտնել էինք, որ օգոստոսի 5-ին, ժամը 02.00-ին, ոստիկանության Մեղրիի բաժնում մի քաղաքացուհուց հաղորդում է ստացվել, որ օգոստոսի 4-ին, ժամը 22.30-ի սահմաններում, անհայտ անձը «ՎԱԶ-2106» մակնիշի ավտոմեքենայով դարանակալել է Ագարակ քաղաքի Չարենցի փողոցի թիվ 22 շենքի մոտ եւ դիտավորյալ հարվածել է իր ամուսնու` 1962 թ. ծնված Ս. Հ.-ի «Նիսան Իքստեռռա» մակնիշի ավտոմեքենային, այնուհետեւ անհայտ անձինք «Պորշ Կայեն» եւ «Մերսեդես Բենց» մակնիշի ավտոմեքենաներով հետապնդել են Ս. Հ.-ին եւ կրակոցներ արձակել նրա ավտոմեքենայի ուղղությամբ:
Հանգամանքները պարզվում են: Կատարվում է հետաքննություն:
