Նաիրիտցիները կդիմեն դատարան իրենց դեմ «շանտաժ» իրականացնելու հայցով։ Այս մասին այսօր՝ օգոստոսի 5-ին, լրագրողներին ասաց «Նաիրիտ» գործարանի մամուլի նախկին քարտուղար Անուշ Հարությունյանը՝ նշելով, որ իրենց պարտադրել են աշխատավարձերը ստանալու համար պայմանագիր կնքել «Նաիրիտ 2» ընկերության հետ՝ հրաժարվելով տույժ-տուգանքներից։
«Մեզ առաջարկվեց կնքել պայմանագիր ու հրաժարվել տույժ-տուգանքներից, այսինքն՝ ստանալ միայն մայր գումարը, իսկ եթե ոչ կարող ենք դիմել դատարան։ Բոլոր նրանք, ովքեր դիմել են դատարան և դատարանը հայցը բավարարել է, այսինքն՝ գործարանին պարտադրել է վճարել նաև տույժ-տուգանքները, նրանց ևս ասվել է՝ աշխատավարձ ստանալու համար, պետք է հրաժարվեք տույժ տուգանքներից։ Այսինքն՝ դատարանի որոշումը չի կատարվել, ինչը ես շանտաժ եմ համարում մեր նկատմամբ ու պարտադրանք»,- ասաց նա։
Նշենք, որ օգոստոսի 4-ին ամբողջությամբ մարվել է բոլոր նաիրիտցիների աշխատավարձերի պարտքը:
Հիշեցնենք, որ գործարանի աշխատակիցների աշխատավարձը հատկացնում է պետությունը՝ էներգետիկայի ոլորտի պետական ընկերությունների շահույթի հաշվին:
Նաիրիտցիները բազմիցս բողոքի ակցիաներ են կազմակերպել կառավարության ու նախագահի նստավայրի մոտ՝ պահանջելով լուծում տալ իրենց խնդրին: Ձեռնարկությունը չի աշխատում 2010 թվականի ապրիլից: