Լեռնային Ղարաբաղի Հանրապետության Շուշի քաղաքում օգոստոսի 15-ին տեղի ունեցավ գարնանը կյանքից վաղաժամ հեռացած գործարար-բարերար Արմեն Բարխուդարյանի հիշատակին նվիրված ֆուտբոլային մրցաշար:
Մրցաշարին մասնակցում էին 9 թիմեր՝ 8 Արցախից, մեկը՝ «Ավինեքսը», Մոսկվայից: Հաղթող ճանաչվեց «Խաչեն» թիմը: Մրցաշարը բարեգործական էր:
Ազատամարտիկների երեք ընտանիքներին հատկացվեց դրամական օգնություն: Արմեն Բարխուդարյանի անվան մրցաշարը կազմակերպել էր նրա այրին՝ Լյուդմիլա Բարխուդարյանը, ինչպես նաեւ նրա ընկերները՝ Սուրեն Օհանովը եւ Իգոր Մուրադյանը: Հատուկ հյուրն էր հայտնի մեկնաբան Նոբել Առուստամյանը: Մրցաշարի ավարտին անցկացվեց ավանդական անվճար վիճակախաղը, որտեղ խաղարկվում էր կենցաղային տեխնիկա:
Արմեն Բարխուդարյանը մեծ ներդրում ուներ Լեռնային Ղարաբաղում ֆուտբոլի զարգացման մեջ: Նա հովանավորում էր մինի ֆուտբոլի մրցաշարերը, ֆինանսապես աջակցում թիմերին, մարզիչներին: Այս տարի նրա ջանքերով առաջին անգամ հաջողվեց անցկացնել մինի ֆուտբոլի առաջին լիարժեք մրցաշար:
Վերա Մարտիրոսյան/ Vera&Football