Հայաստանի հանքարդյունաբերական բիզնեսը կտուժի թանկացած էլեկտրականության պատճառով: Այդ մասին օգոստոսի 20 –ին լրագրողներին հայտնել է Հայաստանի գործատուների միության գործադիր տնօրեն Գագիկ Մակարյանը:
Նրա խոսքով, երկրի հանքերն ու կոմբինատները չեն կարող բարձրացնել իրենց ապրանքների` մետաղական խտանյութի եւ խառնուրդաշատ պղնձի գները, որովհետեւ մետաղների գները ձեւավորվում են միջազգային բորսաներում եւ դրանցից շեղվելն անհնար է: «Հետեւաբար, եկամտի կրճատումը նրանց համար անխուսափելի է, իսկ ոմանք գուցե ուղղակի վնասով աշխատեն »,-նշել է Մակարյանը:
Հիշեցնենք, որ օգոստոսի 1-ից Հայաստանում էլեկտրաէներգիան թանկացել է 6,93 դրամով: Կառավարությունը բնակչության համար ֆինանսավորում է այդ թանկացումը, բայց խոշոր բիզնեսի համար` ոչ: Գնի փոխհատուցման մասին որոշումն ընդունվել էր հասարակական լայն բողոքից հետո: Փոխհատուցումը կշարունակվի, մինչեւ «Deloitte & Touche CIS» աուդիտորական ընկերությունը պատրաստի իր վերլուծությունը. միջազգային տենդերի արդյունքում ընտրված ընկերությունը պատրաստվում է իր աշխատանքն ավարտել 16 շաբաթում: Եթե աուդիտի արդյունքում թանկացումն արդարացի համարվի, սպառողները կսկսեն վճարել նոր սակագնով: Հակառակ դեպքում պետությունը միջոցներ ձեռք կառնի «Հայաստանի Էլցանցերից» հավելյալ գումարը հետ վերցնելու եւ թանկացման համար մեղավոր պաշտոնատար անձանց պատասխանատվության կանչելու համար: