Ուկրաինայի «Նաֆտոգազ» ընկերությունը դիմել է ռուսական «Գազպրոմին»՝ առաջարկելով կանխավճար փոխանցել Եվրոպա ռուսական գազի տարանցման համար: Ինչպես հայտնում է «Կոմերսանտ» թերթը , այդ հարցը քննարկվել է ընկերությունների ղեկավարների երկկողմանի հանդիպման ժամանակ՝ օգոստոսի 21-ին, Մինսկում:
Ինչպես գրում է պարբերականը՝ «Նաֆտոգազը» պատրաստ է այդ կանխավճարի գումարով ռուսական գազ գնել ՝ ստորգետնյա պահեստարանները լցնելու համար:
Պարբերականը ճշգրտում է, որ Ուկրաինային այդպես էլ չի հաջողվել Եվրոպայից ֆինանսավորում ստանալ՝ մինչեւ ձմեռ ստորգետնյա պահեստները լցնելու համար:
Պարբերականը զրուցել է ոլորտի մասնագետներից մեկի հետ , ով նշել է , որ եթե կայացվի նման որոշում, ապա դա պետք է գնահատել որպես Ուկրաինային արված զիջում, թեեւ «Գազպրոմի» համար էլ սա վատ տարբերակ չէ, քանի որ թույլ կտա առանց մեծ ծախսերի ապահովագրել դեպի Եվրոպա գազի մատակարարումները:
Ավելի վաղ «Գազպրոմի» ղեկավար Ալեքսեյ Միլլերը հայտնել էր, որ «Նեֆտոգազը» ամբողջովին գիտակցում է , որ գազի ստորգետնյա պահեստարաններում գազի պաշարի անհրաժեշտ մակարդակը կարող է ապահովվել միայն ռուսական գազի գնումների վերսկումով: «Բայց հիմնական ու միակ խնդիրը ՝ գումարի բացակայությունն է»,- շեշտել է նա: