Սահմանադրության նոր նախագիծը 90-95%-ով համապատասխանում է մեր սկզբունքներին եւ մոտեցումներին։ Այս մասին այսօր՝ օգոստոսի 24-ին, լրագրողների հետ հանդիպմանն ասաց ԱԺ ՀՅԴ խմբակցության քարտուղար Աղվան Վարդանյանը։
Նրա խոսքով՝ հրապարակված նախագծով ընդգծվել է, որ ՀՅԴ-ն հաղթանակել է։
«Մենք առաջարկում էինք երեք սկզբունք՝ անցում կատարել կառավարման խորհրդարանական համակարգին, անցում կատարել հարյուր տոկոսանոց համամասնական ընտրակարգին, ստեղծել այնպիսի համակարգ, որտեղ ընդդիմությունը կունենա էական լծակներ։ Այս երեք հիմնական սկզբունքները արտացոլված են ներկա տեքստում, եւ կարող ենք արձանագրել, որ մեր տեսակետները, մոտեցումները հաղթանակել են»,- ասաց Աղվան Վարդանյանը՝ նշելով, որ ժամանակն է անցնել բովանդակային քննարկման։
Նրա խոսքով՝ այս նախագիծն իրենց բավարարում է, սակայն իրենք ունեն երկու տասնյակ առաջարկություններ, որոնք ներկայացնելու են Ազգային ժողովում։
Հիշեցնենք, որ Սահմանադրության նոր նախագիծն ուղարկվել է Ազգային ժողով։ Սպասվում է, որ աշնանային առաջին քառօրյային սկսվելու է նախագծի քննարկումը։ ԱԺ նախագահ Գալուստ Սահակյանի խոսքով՝ հանրաքվեի անցկացումը նախատեսվում է աշնան վերջին։