Հայաստանի Սահմանադրության նոր նախագծում քաղաքական մենաշնորհի վտանգ չկա: Այս մասին, այսօր՝ օգոստոսի 24-ին, լրագրողների հետ հանդիպման ժամանակ հայտարարել է ԲՀԿ խմբակցության պատգամավոր Միքայել Մելքումյանը՝ հավելելով, որ ԲՀԿ-ին չի մասնակցի սահմանադրական փոփոխությունների դեմ ուղղված շարժմանը:
Նրա խոսքով, ԲՀԿ-ն նախկինում էլ է հանդես եկել խորհրդարանական կառավարման համակարգի օգտին, եւ հիմա չի հրաժարվում այդ գաղափարից:
«Այսօր իշխանությունը կաշկանդված է նախագահի լիազորություններով, եւ հիմա վարչապետն ապագա սահմանադրությամբ արդեն չի ունենա նույնքան ուժեղ լծակներ իրավապահ մարմինների ու դատական իշխանությունների նկատմամբ»,-հայտարարել է Մելքումյանը:
Նա նշել է, որ չլուծված է մնում միայն ազգային անվտանգության ապահովման հարցը, քանի որ անհասկանալի է, թե ով է պատասխանատու դրա համար խաղաղ ժամանակներում:
«Իսկ որ խոսում են իշխանության վերարտադրության մասին, այդ հարցը լուծված է: Իշխանությունը վերարտադրելու է ժողովուրդը, իսկ եթե մենք ասում ենք, որ արդար ընտրություններ չեն կարող լինել, այդ դեպքում միեւնույն է, թե ինչ համակարգ է գործում»,-ամփոփել է պատգամավորը: