Մեծ Բրիտանիայի արտգործնախարարության ղեկավար Ֆիլիպ Համոնդը «Մահ Անգլիային» գրությունը հայտնաբերել է Թեհրանի վերականգնվող դեսպանատան պատին: Պարսկերեն այդ ֆրազը մնացել էր Եղիսաբեթ II թագուհու դիմանկարի տակ 2011-ին դիվանագիտական ներկայացուցչության վրա հարձակումից հետո:
«Ես նայում էի այդ գրաֆիտիին եւ մտածում էի, որ սովորական բրիտանացի գրաֆիտիստը կգնահատեր այդ նկարի կանոնավորությունն ու կառուցվածքայնությունը: Գրաֆիտին լավ տեսք ունի. երեւում է` հեղինակը փորձեր է արել թղթի վրա», - ասել է Համոնդը նոր բացվող դեսպանատան աշխատակիցներին:
The Guardian-ը հաղորդում է, որ Մեծ Բրիտանիայից Թեհրան կուղարկվի վերականգնման մասնագետ` հատուկ ներկերի հետ միասին, որոնք կարելի է օգտագործել XIX դարի դեկորի վերականգնման համար:
Բացումից հետո կշարունակվի շենքի տեխնիկական վերականգնումը:
Իրանում բրիտանական դեսպանատունը նորից բացվել է օգոստոսի 23-ին: Դեսպանատունը փակվել էր 2011 թվին` այն բանից հետո, երբ ամբոխը Լոնդոնի կողմից սահմանված պատժամիջոցների պատճառով քարուքանդ էր արել դիվանագիտական ներկայացուցչության շենքը: