Կրեմլում տեղյակ չեն Ռուսաստանի նախագահ Վլադիմիր Պուտինի Փարիզ ուղեւորության մասին, որն ազդարարել է նրա ֆրանսիացի գործընկեր Ֆրանսուա Օլանդը: Այդ մասին ՌԻԱ Նովոստին հայտարարել է` վկայակոչելով Կրեմլի մամլո ծառայությանը:
«Մոտ ժամանակներս նման ուղեւորություն չի նախատեսված», - նշել են մամլո ծառայությունում:
Ֆրանսիայի դեսպանների առաջ ելույթ ունենալով` Ֆրանսիայի նախագահը հույս է հայտնել, որ Փարիզում հանդիպում տեղի կունենա Վլադիմիր Պուտինի հետ: Ֆրանսիացի առաջնորդի խոստովանությամբ, Փարիզը Մոսկվայի հետ «անկեղծ երկխոսության» հույս ունի:
Ընդ որում նա խոստովանել է, որ ուկրաինական ճգնաժամը էականորեն բարդացրել է Ռուսաստանի հետ հարաբերությունները: Օլանդի խոսքով, դա վնասում է բոլոր կողմերին:
Նա նաեւ չի բացառել, որ շուտով Փարիզում կարող է Ուկրաինայի վերաբերյալ «նորմանդական քառյակի» հանդիպում տեղի ունենալ: Օլանդը հաղորդել է, որ այժմ այդ հարցը քննարկվում է Գերմանիայի կանցլեր Անգելա Մերկելի հետ, փոխանցում է «Ինտերֆաքսը»:
