Թայվանում բացված ցուցահանդեսի ժամանակ 12-ամյա պատանին վնասել է իտալացի նկարիչ Պաոլո Պորպորայի նկարը: «Ծաղիկներ» անվանումով նկարը 1.5 մլն դոլար է գնահատվում:
Ցուցահանդեսի կազմակերպիչների տարածած տեսանյութում երեւում է, թե ինչպես է երեխան սայթաքում եւ, չընկնելու համար, հենվում կտավին: Հետո շփոթված շուրջն է նայում եւ հեռանում:
Կազմակերպիչները որոշել են տղայի ընտանիքից վնասի փոխհատուցում չպահանջել: Կտավի վերականգնման ծախսերը կվճարի ապահովագրական ընկերությունը:
Ըստ Lenta.ru-ի, «Ծաղիկները» Թայվանի մայրաքաղաք Թայբեում անցկացվող The Face of Leonardo: Images of a Genius («Լեոնարդոյի դեմքը. հանճարի պատկերները») ցուցահանդեսին ներկայացված 55 ստեղծագործություններից մեկն է: Ցուցադրությունում ներառված է նաեւ Լեոնարդո դա Վինչիի ինքնադիմանկարը՝ 200 մլն եվրո արժողությամբ:
