Վրաստանի Բաթումի քաղաքում հորդառատ անձրեւների, քամու եւ 4-բալանոց փոթորկի հետեւանքով քաղաքի փողեցները ջրի տակ են անցել: Թբիլիսիից եւ Քութայիսիից փրկարար բրիգադներ են ուղեւորվում Բաթումի, բնակիչների մի մասը մնացել է առանց էլեկտրականության:
Աջարիայում վատ եղանակը տեւել է մի քանի ժամ: Ջրի տակ են հայտնվել Բաթումիի փողոցները, շենքերի առաջին հարկերը եւ երկաթգծի կայարանը:
Արտակարգ իրավիճակների ծառայության աշխատակցի խոսքով, վերջին մի քանի ժամերին արձանագրվել է «շտապօգնության» 90 կանչ, մասնավորապես, փողոցում խցանված մեքենաներից ու ջրի տակ մնացած առաջին հարկերի բնակարաններից ու խանութներից:
Ծառայությունում լրագրողներին հայտնել են, որ Թբիլիսիից եւ Քութայիսիից փրկարար ծառայության մի քանի բրիգադներ են ուղեւորվում Բաթումի՝ հատուկ տեխնիկայով», հաղորդում է Sputnik-Գռուզիան:
Նմանատիպ իրավիճակ է Փոթիում, որտեղ ջուրը նույնպես լցվել է կենտրոնական փողոցները եւ ջրի տակ թողել շենքերի նկուղներն ու առաջին հարկերը: Կայծակի պատճառով քաղաքի մի մասը մնացել է առանց էլեկտրականության:
Ինչպես Բաթումիում, այնպես էլ Փոթիում, հիմա ուժեղ անձրեւ է տեղում: