Մարոկկացի Այուբ Ալ Կազանիին (Ayoub El Khazzani), որը կրակ էր բացել Ամստերդամ-Փարիզ գնացքում, մեղադրանքներ են ներկայացրել. 25-ամյա տղամարդը մեղադրվում է ահաբեկչության շրջանակում սպանության փորձ կատարելու, ահաբեկչական խմբավորմանն անդամակցության, ինչպես նաեւ անօրինական զենք պահելու, կրելու եւ տեղափոխելու համար:
Ինչպես հաղորդել է Փարիզի դատախազ Ֆրանսուա Մոլենը (Francois Molins), մեղադրյալին ձերբակալելիս նրա մոտ Կալաշնիկով ինքնաձիգ են հայտնաբերել, Լյուգեր ատրճանակ եւ բենզինով լի շիշ: Բացի այդ, հաստատվել է, որ գնացքում մարոկկացին իսլամական քարոզչության տեսաժապավեն է դիտել, հաղորդում է Lenta.ru-ն:
Օգոստոսի 21-ին Thalys գնացքի վագոնում, որը Հոլանդիայի մայրաքաղաքից ուղեւորվել է Ֆրանսիայի մայրաքաղաք, 25-ամյա մարոկկացի Այուբ Ալ-Կազանին ինքնաձիգ զենքից կրակ է բացել` վիրավորելով երկու մարդու: Նրան չեզոքացրել են ուղեւորները, որոնց թվում են եղել երկու ամերիկացի զինվորական, ինչպես նաեւ ֆրանսահայ Մարկ Մուգալյանը: