Ամերիկացի Վեսթեր Լի Ֆլանագանը, որին կասկածում են Վիրջինիայի նահանգի Մոնետա քաղաքում WDBJ7 հեռուստաընկերության լրագրողի եւ օպերատորի սպանության մեջ, ինքնասպանության փորձից հետո հիվանդանոցում մահացել է։ Այս մասին հայտնել է նահանգի շերիֆ Բիլ Օվերթոնը։
Նրա խոսքով՝ լրագրողների սպանությունից հետո ոստիկանները փորձել են կանգնեցնել 41-ամյա Ֆլանագանի մեքենան, սակայն նա կարողացել է փախչել նրանցից, որից հետո կորցրել է կառավարումը եւ ընկել առուն։ Իրավապահները կասկածյալին հայտնաբերել էին մեքենայում ինքնասպանության փորձի հետեւանքով ծայրահեղ ծանր վիճակում եւ տեղափոխել հիվանդանոց։
Շերիֆը նաեւ հայտնել է, որ Ֆլանագանը 23-էջանոց ուղերձ էր ուղարկել ABC հեռուստաընկերության խմբագրություն։ Նամակում ասվում է, որ աֆրոամերիկացի Ֆլանագանի գործողությունների պատճառը Չարլսթոնում ռասայական խտրականության հողի վրա կատարված սպանությունն է, գրում է ՏԱՍՍ-ը։
Նշենք, որ Չարլսթոնում սպիտակամորթ երիտասարդը եկեղեցում 9 աֆրոամերիկացու էր սպանել։
Հիշեցնենք, որ Մոնետի ողբերգությունը տեղի էր ունեցել օգոստոսի 26-ին։ Կրակոցներից վայրկյաններ առաջ նկարահանած կադրերում երեւում է, որ նկարահանող խումբը հարցում էր անցկացնում Bridgewater Plaza առեւտրի կենտրոնի գնորդների շրջանում։ Կրակոցներից զոհվել էին Էլիսոն Փարքերը եւ Ադամ Ուարդը։
WDBJ7-ն հաստատել է, որ Ֆլանագանն իրենց նախկին աշխատակիցն է եղել։